BRUNO DIETRICH
TEXTE - CD "Château Dopamin"Live Musik
Es ligt geng no Aues dinne
​
Es isch e chaute Namitag Änds Januar, dr Näbu dicht u o süsch isch nid viu klar
I ha es gnursch im Chopf mit huufe Frage wo mi plage u grad jitz machsch du di rar
U we de du da vor mir steisch u unbequemi Sache seisch, verstahn i nümm was du redsch
Bevor mir üs no meh verenne, sötte mir hie Farb bekenne, auso faus du das o wetsch
Aues oder nüt, mir sötte nid länger warte
Jitz oder nie, setze mir aues uf ei Charte
Aues oder nüt, verlüüre oder gwinne
Jitz oder nie - es ligt geng no Aues dinne
I ha mir öppe die scho überleit, was Sach isch hie u was so i dim Härz abgeit
I ha ghaderet u mi nid gwagt, di u mi nie richtig gfragt, wis de würklech um üs steit
U wenn i mau dr Muet gha ha, hesch du grad e ke Zyt oder süsch e Usred gha
Bevor mir üs no meh verenne, sötte mir hie Farb bekenne, we das no söu witergah
Aues oder nüt, mir sötte nid länger warte
Jitz oder nie, setze mir aues uf ei Charte
Aues oder nüt, verlüüre oder gwinne
Jitz oder nie - es ligt geng no Aues dinne
Es isch e schöne Sunnti Morge im Früehlig afangs April u d Sunne schynt...
​
​
​
​
​
​
E Sinfonie
​
Chumm säg doch eifach wis dir würklech geit
u dass es um di grad nid so rosig steit
hesch wiedereinisch gäbig investiert
höch pokeret u zviu riskiert
Ds Abetüür hesch gsuecht u ziemlech ungestüm,
hesch di verirrt u fingsch di säuber nümm
u jitz chunsch hinger u vore nümme drus,
u hesch dr Blues
Ds Läbe isch e Sinfonie in Moll u Dur
wär isch dr Dirigänt u Macher vo dr Partitur
mau git's e Melodie wo ds Ohr verwöhnt
u de wieder öppis wo nid eso agnähm tönt
... e Sinfonie mau Moll, mau Dur
wär isch dr Komponischt u Dirigänt vor Partitur
mau git's e Melodie wo ds Ohr verwöhnt
u de wieder öppis wo nid eso agnähm tönt
Hesch dir wiedereinisch öppis vorgmacht hie
di säuber glingget, wi scho öppe die
u chli vergässe, dass es no es Gägenüber git
wo nid eifach eso iverstangen isch dermit
Aus gäbs nüt angers, hesch di fokusiert
u dr Verstand het nümme funktioniert
hesch di verboge u verlore ir Sach
u jitz ligsch flach
Ds Läbe isch e Sinfonie in Moll u Dur
du bisch dr Dirigänt u Macher vo dr Partitur
mau git's e Melodie wo ds Ohr verwöhnt
u de wieder öppis wo nid eso agnähm tönt
... e Sinfonie mau Moll, mau Dur
du bisch dr Komponischt u Dirigänt vor Partitur
mau git's e Melodie wo ds Ohr verwöhnt
u de wieder öppis wo nid eso agnähm tönt
... ds Läbe isch e Sinfonie
mau Moll mau Dur!
​
​
​
​
​
​
​
I mim Härz
​
Mängisch guet we me’s grad seit,
u nid lang dasumetreit
I blase d Cherze us
U ga mau usem Huus
I bruche e nöie Wind wo wäit
u macht dass mini Mühli wieder dräit
Mängisch chunts angers aus me dänkt,
füehrt nid dert häre wo me’s länkt
I nime no zwe, drei Schlück
u i sehne mi zrügg
a di Zit won i’s no liecht ha gno,
wen öppis nid grad guet isch usecho
I luege zue wi du geng chliner wirsch,
bis du am Horizont verschwunde bisch
So wi du geng chliner wirsch,
vergeit o dr Schmärz mit dr Zit u liechter wärds
u i trage di no geng i mim Härz
...i trage di no geng i mim Härz...
Isch’s mängisch besser we me schwigt,
u Aues bim Aute blibt?
Nüt Nöis, nüt Schlaus,
es wiederhout sech aus
I träie mi im Kreis u ja i weis
nid wo das no härefüehrt uf mire Reis
I luege zue wi du geng chliner wirsch,
bis du am Horizont verschwunde bisch
So wi du geng chliner wirsch,
vergeit o dr Schmärz mit dr Zit u liechter wärds
u i trage di no geng i mim Härz
...i trage di no geng i mim Härz...
​
​
​
​
​
​
​
Isch dr Ruef mau ruiniert
​
Hey, vo dir ghört het me lang nüt meh,
ligts äch a de Allgorythme
oder wöu di eismau bsoffe
hesch uf Social-Media verloffe
Das Biudli denn wo du fasch blutt
U drigluegt hesch o rächt kaputt
Das chasch nid schnäu Mau uselösche,
wöu ds Internet, das chasch nid eifach wösche
Wed’s de ändlech hesch kapiert
Isch de eh scho z viu passiert
Doch isch dr Ruef mau ruiniert
Läbt sech’s ganz guet ungeniert
Hey, vo dir ghört het me lang nüt meh,
ligts äch a de Allgorythme
oder wägem Micro-Targetting
däm psycho-profilierte Facebook-Ding
Was me geschter besser nid postet hät,
vernimsch du hüt im Gruppe-Chat
was süsch so geit u wär mit wäm
erfahrsch du hüt uf Instagram
Wed’s de ändlech hesch kapiert
Isch de eh scho z viu passiert
Doch isch dr Ruef mau ruiniert
Läbt sech’s ganz guet ungeniert
​
​
​
​
​
​
I dere chaute Nacht
​
Zyt vergeit u gah tuet nüt, weiss nid won i bi blibestah
i chume nümm vom Fläck hie u chas grad nid verstah
Irgendöppis geit nid uf, irgendöppis louft nid rund
Mim Uhrwärch fäut es Zahnrad u i gloub du bisch dr Grund
Aues won i dir no möcht säge, we du grad jitz würdsch vor mir stah
u au di huufe Frage, won i e Antwort druf wett ha
I stah alei a dere Hautsteu, wi ne seichnasse Schwamm
u warte hie vergäbe, uf ds längscht verpasste letschte Tram
Jitz won i di chönnt bruche, lasch du mi im Räge la stah
u dr Bode unger mine Füess laht langsam la gah
uf di, won i wett boue u i mi dranne fescht wett häbe,
warten i i dere chaute Nacht vergäbe.
De stig i haut i ds erschte Tram, e früeche Vogu faht dr Wurm
Dr Tag erwachet, d Sunne grüesst u i ha langsam wieder warm
Jitz nimis haut eso wis isch, o wen i mirs angers vorgsteut ha
wöu irgendeinisch mues es wytergah u wär nid wott het gha
Jitz won i di chönnt bruche, lasch du mi im Räge la stah
u dr Bode unger mine Füess laht langsam la gah
uf di, won i wett boue u i mi dranne fescht wett häbe,
warten i i dere chaute Nacht vergäbe.
​
​
​
​
​
​
Geng meh no vo dir
​
Einzigartig u famos, du bisch mis grosse Los
Supergschyd u wunderschön, i Schwärme i de höchschte Tön
Ds Beschte wo mir jeh isch gscheh, i ha nie öppis bessers gseh
Du bisch d Superlative, für di git’s ke Alternative
Di chame nid ersetze, die Rolle chasch nid angersch bsetze
Du bisch mi Mega-Hit, eso schön dass es di git
(wöu) Du bisch so „uh“
(und) Du bisch so „ah“
(und) Du bisch so „oh“
(ja) Du bisch so „wuaow“
Du bisch so „uh – ah – oh“
I cha nid gnue becho
Wen i di gseh so vor mir
Wott i geng meh no vo dir
Phänomenal, grandios, ja du bisch mis grosse Los
Sithär dass du mi verwöhnsch, bin i dr glücklescht Mönsch
Wo du mi zerschte Mau hesch küsst, da han i sofort gwüsst
Du bisch mi Super-Gwinn, mit dir macht ds Läbe Spass u Sinn
i wett es wird nie angersch sy, du bisch ds Tüpfli ufem i
für di chum i geng cho z renne, eso schön dass i di kenne
Du bisch so „uh – ah – oh“
I cha nid gnue becho
Wen i di gseh so vor mir
Wott i geng meh no vo dir
Du bisch so „uh – ah – oh“
I cha nid gnue becho
Wen i di gseh stah vor mir
Wott i geng meh ha vo dir
​
​
​
​
​
​
Es Schnüerli drum
​
Samichlous du liebe Maa
I wett das Jahr kes Gschänkli ha
Viu lieber wett i, dass d’ chönntsch luege, dass di Hungrige z’ Ässe hei
Samichlous du liebe Maa
Chasch nid mau luege mache z gah
Dass die wo gar nüt hei, mau ds Nötigschte bechöme wo si wei
Chumm mir näme chly Vernunft u tüe es Schnüerli drum
Und schänke Solidarität ungerem Tanneboum
Samichlous du liebe Maa
Chönntsch nid i d Krise-Regione gah
Und dert ga ds Chriegs-Spilzüüg verstecke, bevor no meh sinnlos verrecke
Was mues de alles no Bach ab gah
Bevor mir andlech wei verstah
Dass dä Planet es riise Gschänk isch, wo üs allne ghört z entdecke
Chumm mir näme chly Vernunft u tüe es Schnüerli drum
Und schänke Solidarität ungerem Tanneboum
Mir näme Liebi u Verstand u tüe es Schnüerli drum
O wes no so utopisch schynt, mir blibe drann am Troum
Samichlous du liebe Maa
I hätt da es speziellers Wünschli gha
Chasch nid chly Liecht i ds Dunkle bringe, während däm i das Lied da singe
I ha so viu, i wott mau nüt
Chumm gibs doch lieber arme Lüt
I zünde e Cherze a u i gloube dra
​
​
​
​
​
​
We du bi mir bisch
​
I male Biuder i mim Chopf, lyrisch u farbefroh
so richtig schön romantisch, isch no fasch jedes usecho
dini rychi Farbpalette zeigt mir e wunderbari Wäut
aues Angere aus schwarz u wyss, dini Art u Wys
isch das wo mir het gfäut
We du bi mir bisch, de schynt d Sunne o i dr Nacht
we du bi mir bisch, loderet ds Füür wo du i mir hesch entfacht
we du bi mir bisch, bloderet edlä
Chateau Dopamin mit Endorphin i mim Bluet
we du bi mir bisch, bin i glücklech u es geit mr souguet
Ha ne Schmätterling im Buuch, nei sisch gloub e ganze Schwarm
u lig ig i dine Arme, gisch du mir nid nume warm
dini Nechi laht mi la flüge ine wunderschöni Wäut
aues Angere aus schwarz u wyss, dini Art u Wys
isch das wo mir het gfäut
​
​
​
​
​
​
​
Es isch e Ros entsprunge
​
Es isch e Ros’ entsprunge
us ere Wurzle fiin u zart
scho di Aute hei gsunge
vo Muetter Ärde chunt di Art
u het es Blüemli bracht
Mitts i'me chaute Winter
i’re verschneite dunkle Nacht
Das Rösli won i besinge
kennt e ke Rassenungerschid
gäub, schwarz, rot u wyssi Gringe
"nach Farbe trenne" kennt äs nid
s’het Liecht i ds Dunkle bracht
Mitts i'me chaute Winter
i’re verschneite dunkle Nacht
Mitts i'me chaute Winter
het’s e chli Liecht i ds Dunkle bracht
...s’het e chli Liecht i ds Dunkle bracht
...i ds Dunkle bracht
​
​
​
​
​
​
I lose no e Song zwe
​
D Zyt geit verbi
s’ isch wieder e schöne Summer gsi
u ds Loub gheit mau wieder vo de Böim
Der Tag macht sech rar
i sitze wieder öfters i ’re Bar
u touche i ’nes Gedankemeer und tröime
Uh, i warte u lose no e Song zwe
Ja, i warte u lose no Song zwe
Uh, i lose u warte no e Song zwe
Für so öpper wi di z gseh
Mit der Zyt wird alles klar
u i sitze geng no i dere Bar,
i dere Stadt won i scho geng
ha gwohnt ir gliche Strass
Zyt geit verbi,
früecher oder speter gsehsch es i
u i drücke no mau der glich Song
u blibe no chli uf der Gass
Uh, i warte u lose no e Song zwe
Ja, i warte u lose no Song zwe
Uh, i lose u warte no e Song zwe
bis i schlussändlech de di gseh!
​
​
​
​
​
​
TEXTE - CD "Erschti Hiuf"
Erschti Hiuf
We dr Honig nümm chasch stryche, wöu är het kristallisiert
steusch ne ufen Ofe ufe, bis är wieder flüssig wird
Ds Lyntuech wösch isch mit Bachpulver, umso wysser strahlts
und gäge Rotwyfläcke ufem Lieblings-Hemli nimsch de Salz
wosch ds Siuberbsteck zum Glänze bringe, gryfsch zur Zahnpaschta
und Lavändu bruchsch, wed mau sötsch Motte im Chleiderschrank in ha
Für fasch Aues git’s e Lösig und i weiss du kensch se Au,
bisch mit aune Wasser gwäsche, so ideerych und schlau.
Für fasch Aues git’s e Lösig und stahn i mau im Schiuf,
weiss i, won i mi muess mäude – Du bisch myni Erschti Hiuf!
Natron eliminiert nid nume Rost ir Röstipfanne
dr Zibelegruch a de Finger isch o subito vergange
Rollmops, Späck und Spieguei – i kämpfe gäg ne Kater
zu glyche Teile Wasser suufe, meint hie mi Berater
mit Sellerie und Artischocke steisch o du di Maa
und gäge miudi Depressione hiuft Johannis-Chrut derna
Für fasch Aues git’s e Lösig und i weiss du kensch se Au,
bisch mit aune Wasser gwäsche, so ideerych und schlau.
Für fasch Aues git’s e Lösig und stahn i mau im Schiuf,
weiss i, won i mi muess mäude – Du bisch myni Erschti Hiuf!
Du bisch myni unbestrittni Erschti Hiuf!
​
​
​
​
​
Bier Idee
​
Paar Type hei es Rathus boue, derby vergässe Fänschter ine z’ tue, es geit nid lang hett eine d lösig gfunge
är meint me chönt doch ds Liecht voruss mit Säck ifah und nächär inebringe, wär weis öb das isch glunge
Yeah...Yeah...Yeah...so öppis vo’re Bier – Idee
Oh, Je-mi-ne...han i auso scho lang nümm gseh
Di gliche Jungs hei während em Chrieg d Chileglogge vor em Feind versteckt, si sy mit der Glogge uf em Schiff use uf e See
irgendwenn hei si Glogge abeglah und hei a dere Steu i ds Schiff es Zeiche gschnitzt, die Chile het nie meh e Glogge gseh
Yeah...Yeah...Yeah...so öppis vo’re Bier – Idee
Oh, Je-mi-ne...han i auso scho lang nümm gseh
​
​
​
​
​
​
Schnäggeloch
​
Wet dir scho lang mau öppis säge
es spricht grundsätzlech o nüt drgäge
dir z verzeue was i dänke, isch ja würklech nid verwäge
I steue mir ganz eifach vor
es stöngi mir nüt schwärs bevor
has ja x-mau vor mi häregseit, win es Gedicht trag i dr s vor
Aber jitz grad won i vor dir stah, gseht aues angersch us und mi
het dr Muet verlah dir z säge, was i wet und i
verchrüüche mi i mim Schnäggeloch, decke mi mit Zwiifu zue
hoffe dr Tag wird cho, da han i de vom Versteckis-Spile gnue
Zyt vergeit, passiert isch nüt
und i begägne no so viune Lüt
I ha di versuecht z vergässe, ha’s probiert doch o no hüt
träit sech aues geng no um di
es isch egau won i grad bi
und langsam wird mir klar, du bisch di Richtigi für mi
​
Aber jitz grad won i vor dir stah, gseht aues angersch us und mi
het dr Muet verlah dir z säge, was i wet und i
verchrüüche mi i mim Schnäggeloch, decke mi mit Zwiifu zue
hoffe dr Tag wird cho, da han i de vom Versteckis-Spile gnue
Und morn de wen i vor dir stah, gseht aues besser us für mi
I ha dr Muet dir z säge, was i wet und i
chume us mim Schnäggeloch und Texte di chly zue
dr Tag wird cho, morn han i vom Versteckis-Spile gnue
​
​
​
​
​
Wär i hüt nid was i bi
​
I bi so dankbar, dass du da bisch für mi,
s’wär haub so schön und weniger wiud ohni di
ha di o öppe die aus Vorbiud gno
und bi de hüfig so o wytercho
schön, dass du hüt o geng no zue mr steisch
dass du mi so nimsch win i bi und o versteisch.
Ohni di - wär i hüt nid, was i bi
Ohni di - chönt i hüt nid so glücklech si
Ohni di - wär i hüt nid, won i bi
Ohni di - chönt hüt alles angersch si
I lueges nid aus säubschtverständlech a
dass i s mit dir so cheibe guet cha ha
und i frage mi, wie das söu wytergah,
ja, bisch de du oder i mau nümme da
Jedi Sekunde won i di cha gseh,
gniess i sehr und wünsche mir vo däm no meh
​
​
​
​
​
Miss Fortuna
​
We am Horizont kes Liecht meh brönnt und du hesch nümme z lache
und dr Schmärz schynt unvergänglech, jedes Mal nach em erwache
we dr Näbu no so dicht isch, irgendwenn schynt d Sunne dri
und irgendeinisch tout dr See uf, är cha no so gfroore si
Eines Tages Miss Fortuna, chlopfsch du wieder a mi Tür
I weiss, i cha nid eifach warte – i muess o öppis tue derfür
I gloube dra und giben alles, i han e mächtig länge Schnuuf
o we mir no so viu im Wäg steit, i giben eifach nid uuf,
i giben nid uuf
O we Au die um di ume, nümme a di gloube
tue ds Handtuech nid grad wärfe, la di diner Tröim o nid beroube
für all di Frage wo uftouche, treisch en Antwort i dir inn
irgendwenn wird alles klarer, irgendwenn git alles e Sinn
Und us de Steine, wo me dir i Wäg leit, bousch dir nadisna
e Brügg zu neuen Ufer, e so, dass es cha wytergah
we dr Näbu no so dicht isch, irgendwenn schynt d Sunne dri
und irgendeinisch tout dr See uf, är cha no so gfroore si
Eines Tages Miss Fortuna, chlopfsch du wieder a mi Tür
I weiss, i cha nid eifach warte – i muess o öppis tue derfür
I gloube dra und giben alles, i han e mächtig länge Schnuuf
o we mir no so viu im Wäg steit, i giben eifach nid uuf,
i giben nid uuf – i giben eifach nid uuf
i giben nid uuf – i giben eifach nid uuf
i giben nid uuf
​
​
​
​
​
Ha d Schnouze vou
​
Du geisch mir uf e Wecker
mit dim ewige Gemecker
wieso müesse mir geng aues usdiskutiere
muesch geng aues hingerfrage
und störsch di no viu a mim Betrage
wieso chasch du mi nid eifach akzeptiere
Ha d Schnouze vou und d Ohre zue – hüt ghöri eifach nüt
i schiebe e ruhigi Chugle und gniesse Zyt
Ha d Schnouze vou und d Ouge zue – hüt machi eifach nüt
häbe dr Gring i d Sunne und nippe amne Flüt
Dr Chef `sch mau wieder muff
isch grantig u chli gnietig druff
wieso chan är nid eifach i sim Büro blibe
är git überau si Sänf derzue
aber gäbi besser eifach Ruhe
und sött, so lang är schlächt druff isch chly schwige
Ha d Schnouze vou und d Ohre zue – hüt ghöri eifach nüt
i schiebe e ruhigi Chugle und gniesse Zyt
Ha d Schnouze vou und d Ouge zue – hüt machi eifach nüt
häbe dr Gring i d Sunne und nippe amne Flüt
​
​
​
​
​
Karma
​
Du hesch z Gfüeu du sigsch e Heud
und dis viele Gäud isch alles wo zeut
und eines Tages ghöri dir di ganzi Wäut
Du tuesch d Lüt für dumm verchoufe
wosch, dass si dr nacheloufe
und füersch se skrupellos vom Räge i d Troufe
Chumm mir legen is besser chli warm a
wöu Zyte si grad bitter-chaut und schitter
chumm mir lege meh Wärt uf ds Karma
und spränge Gränze, Stachudraht und Gitter
Di Egoismus geit mir ufe Sack
und mit dir, dis elitäre Pack
dir gränzet us und sperret i, mit öiem Kack
Dir versprächet Büetz und Brot
aber bringet d Lüt i grossi Not
und der Friede uf dere Chugle usem Lot
Chumm mir legen is besser chli warm a
wöu Zyte si grad bitter-chaut und schitter
chumm mir lege meh Wärt uf ds Karma
und spränge Gränze, Stachudraht und Gitter
Lahn is zämestah und im Arm ha
wöu Zyte si grad bitter-chaut und schitter
chumm mir lege no meh Wärt uf ds Karma
und spränge Gränze, Stachudraht und Gitter
(...und du hesch z Gfüeu du sigsch e Heud)
​
​
​
​
​
Ungerwägs
​
Dä Zug won i drinn sitze, hautet gar säute bis nie
und i frage mi, was alles a mir verbizogen isch bishär
Dr Wunsch isch mängisch gross, a dere Notbräms z’ zieh
bekannte Wäge z folge, faut mr schwär
Bi ungerwägs und bis a ds Ändi vo dr Wäut,
dürforsch i mänge Egge unger däm Himmuszäut.
Jede Schritt uf mire Reis chönt, so wie jede Ougeblick,
es Tor sy i d Freiheit uf em Wäg zum Glück.
Zyt vergeit im Flug überem Wulchemeer
immer witer flüg i rastlos, o mau hin und här
und won i de o bi, da suech i chrüz und quer
d Luft wird dünn und z Schnuufe faut mr schwär
Bi o scho ufem Schiff ar Reling gstange
und ha Tröim versänkt im dunkublaue Meer und när
han is gno wis isch und glich nid ganz verstange
und grad wes eifach schynt, faut’s mr dopplet schwär
Bi ungerwägs und bis a ds Ändi vo dr Wäut,
dürforsch i mänge Egge unger däm Himmuszäut.
Jede Schritt uf mire Reis chönt, so wie jede Ougeblick,
es Tor sy i d Freiheit uf em Wäg zum Glück.
Bi ungerwägs und bis a ds Ändi vo dr Wäut,
dürforsch i mänge Egge unger däm Himmuszäut.
Jede Schritt uf mire Reis chönt, so wie jede Ougeblick,
es Tor sy i d Freiheit uf em Wäg zum Glück.
Dä Zug won i drinn sitze, hautet gar säute bis nie
​
​
​
​
​
Dokter Blues
​
Är isch nid nume dr Herr Dokter
ne-nei, am Wuchenänd da rockt’er
är spiut Gitarre und Klavier
und chly Mugiige nach paar Bier
Är tuet dir Guets, dr Dokter Blues
Bisch imene Loch, schriisst är di druus
Är macht dr Clown und meint mit Lache
Chönisch scho mängs viu gsünger mache
Bevor är Pharma-Zügs tuet sprütze
Luegt är zersch öb Rot Wy würdi nütze
Är tuet dir Guets, dr Dokter Blues
Bisch imene Loch, schriisst är di druus
Är tuet dir Guets, dr Dokter Blues
Bisch imene Loch, schriisst är di druus
Won i ufgstange bi hüt Morge
Macht mir mi Läbere chly Sorge
Und dr Dokter Blues meint ganz adrett
I söu doch hüt chly früecher ab itz Bett
Är tuet dir Guets, dr Dokter Blues
Bisch imene Loch, schriisst är di druus
Är tuet dir Guets, dr Dokter Blues
Bisch imene Loch, schriisst är di druus
Bondyé, i bi dr Dokter Blues
I bi Spezialischt und chume druus
I heile di vo Chopf bis Fuess
Rüef mir, wenn i d Hang uflege muess
I tue dir Guets, bi Dokter Blues
Bisch imene Loch, schriiss i di druus
Im heile, heile Säge bin i Meischter
und ha’ne Draht zu guete Geischter
mit Musiziere und mit Singe
wei mir e Wäg usem Eländ finge
I tue dir Guets, bi Dokter Blues
Bisch imene Loch, schriiss i di druus
Är tuet dir Guets, dr Dokter Blues
Bisch imene Loch, schriisst är di druus
Är tuet dir Guets, dr Dokter Blues
Bisch imene Loch, schriisst är di druus
Är tuet dir Guets, dr Dokter Blues
Bisch imene Loch, schriisst är di druus
​
​
​
​
​
Aarezyt (Rimeik)
​
Es isch Betrieb entlang der Aare z Bärn und ds Wätter isch o schön
D Lüt pfyffe wieder Melodie, i de höchschte Tön
D Wäuebrättler straffe ds Seili und zybe d Aare zdüruuf
Am Ufer stimmt eine Gitarre und isch scho gli im erschte Groove
Witer obe sitze d Philosophe im Kreis bi rotem Wy
uns si hei um d Wäut z verbessere huufe Argumänt derbi
Es isch Aarezyt
ja, nimm no Badhose mit
Mit em Velo u `re guete Luune
chumm mit o du wirsch stuune
Es isch Aarezyt
ja, nimm no d Gitarre mit
E ligu Lehm un e Wurscht zum brate
und e gueti Fläsche Rote
Ja, so Summer isch e gfröiti Sach und d Lüt mache Sunnegsicht
Gmüetlech ligsch im Freie und vernimsch so mängi Gschicht
Me leit sech wieder légèr a und gniesst di warmi Luft
und wenn es faht afa dämmere, de stigt e Brätliduft
Um ds Füür um sitze Fründe, si sy zfride, das isch ke Frag
und jede fröit sech zinnerscht inn, scho uf e nächschte Tag
​
​
​
​
​
Lääri Wohnig
​
Uf däm Stueu wo du immer gsässe bisch, sitz ig jitz ganz elei
ir chaute Chuchi vo dere Wohnig, wo du und ig mau zäme gläbt hei
di häue Steue zeigen uf wo dini Biuder ghanget si
sit du vor churzem au di Plunder abzüglet hesch, isch dä Zouber verbi
- es isch e wunderbari Zyt gsi
Ig wott no mau so’ne süesse Kuss vo dir
S’isch bitter ohni Ändi, wünsche di zrügg zu mir
Du fäusch mir sehr, ig has de gmerkt won ig
hüt Morge bi erwachet, ganz allei, i dere viu z’ lääre Wohnig
Und d Spatze uf em Fänschtersims, si o scho lang nümm verbicho
o si hei ds lääre Fuetterhüsli haut e so zur Kenntnis gno
und ds Bluemestöckli näbedran, luegt o ziemlech durschtig dri,
es erinneret mi a üsi Reis, wo mir dür d’ Wüeschti gloffe si
- es isch e wunderbari Zyt gsi
Ig wott no mau so’ne süesse Kuss vo dir
S’isch bitter ohni Ändi, wünsche di zrügg zu mir
Du fäusch mir sehr, ig has de gmerkt won ig
hüt Morge bi erwachet, ganz allei, i dere viu z’ lääre Wohnig
(und i däm viu z grosse Bett)
​
​
​
​
​
​